FAMOBÖRÖ
So gamaehuta wa’omuso dödö börö mbuala (bersukacita karena) ba fa’omuso dödö ba khö Zo’aya (bersukacita di dalam). Dozi niha omuso dödöra na so harazaki, so zoguna bongi ma’ökhö, lö mofökhö, ba tanö bö’önia. Ba möi göi ni’erai ba duru ha niha zomuso tödö ba khö Zo’aya na inötö “lö mobowo ara, lö bua nagu, mo’amböta gö ba danö” (17). Hiza, bakha ba ayati si 18 ifa’ema Habakuki wa “Ya’odo somuso tödö ba khö Yehowa, owuawua dödögu khö Lowalangi sangorifi ya’o.” Ba da’ö ifaduhu’ö Habakuki wa fefu noro dödöda ba zoguna khöda, ba zoroiyomoda, ba wabanuasa, ba lala halöŵö, lö tobali abula dödöda zi manö, me fa’omuso dödöda si ndruhundruhu so ba khö Yehowa Lowalangi sangorifi ya’ita. Hana wa tola omuso dödöda ba ginötö si manö?
FAMOTOKHI
Ba zinunö Habakuki andre, so 3 (tölu) faosatö zinangea ifa’ema khöda hadia zi tobali fa’omuso dödönia khö Zo’aya.
Si föföna, fa’omuso dödö börö me Lowalangi zamatörö fefu hadia ia (10-12). Fa’abu dödö Habakuki ya’ia me no sa’ae itehegö Lowalangi tehuku Ndraono Gizeraeli ba danga niha sebua horö. Lö sa’ae sabe dödöra ba zi no alua khöra; lö göi soguna khöra ba ginötö andrö. Fefu da’ö, lö tobali fangaetu zinali wanötönania khö Zo’aya, me itörö tödönia zi no irai ifalua Lowalangi ba wondrorogö ya’ira i‘otarai danö Miserayi irugi ba ginötö Habakuki andrö. Bakha ba zi manö, ifahaö ita Habakuki ena’ö böi olifu ita zi no ifalua Lowalangi khöda ba zi no numalö (Yes. 63:11). Fondrorogö-Nia ya’ita ba ginötö si lalö ba no tobali tandra wa lö irai iröi ita Lowalangi andrö ba lala döröŵada. Imane Dawido, “Suno Yehowa, ya’ugö tödögu, ba böi olifugö’ö zi sökhi andrö, fefu, nibe’e-Nia khöu” (Sin. 103:2; 111:4; 77:11-12; fahela BZ AFY No. 13 Suno Zo’aya Ya’ugö Tödö).
Si dua, omuso dödö börö me Lowalangi andrö zangefa’ö ba sangorifi ya’ita (13-16). Ifaduhu’ö göi Habakuki andre wa famati-Nia tenga famati si lö ata’u ma sanizinizi (16). Heŵa’ae manizi wamatinia, ba ifuli imane wa sahono ia, lö hedehede börö me so Lowalangi sangorifi ba sangefa’ö ya’ira (menantikan Tuhan). Ba wangorifi banua-Nia, ilau fakudo Yehowa, isuwö nudu mbanua-Nia ba lö ibe’e ni’o’aya zi no so barö kandra wangorifi andrö khö-Nia (Sin. 121:1-8). Imane Dawido, “Nisuno Zo’aya, ero ma’ökhö I’onoro noroda. Fangorifida Lowalangi” (Sin. 68:20). Börö me Yehowa zondrorogö ya’ita, ba ifarou ita ena’ö tasao’ö föna Lowalangi zanizi tödöda ba wa’auri, ta’ohe khö-Nia ba wangandrö. Ifarou ita Fetero, imane “Mibe’e balazi Ia, na so zabu dödömi, gofu hadia ia, soso sa dödö-Nia ami” (1 Fet. 5:7; Fil. 4:6). Börö me lö iröi ita, ba tabaloi nifalua-Nia khöda, böi tahulö ginötö ba böi tafaso Ia, me fohalöŵö-Nia khöda ba no molo’ö somasi Ia.
Si tölu, fa’omuso dödöda börö me Lowalangi zi tobali ohitö wa’aurida (17-19). Ba zura Zinunö 142:6 imane “Mu’aodo khöU, Ya’ugö Yehowa, umane: Saŵatögu Ndra’ugö, urakhagu ba danö niha sauri.” Itohugö göi wanguma’ö Gasafo, imane “Alakhö alö nösigu ba alakha ariri dödögu, we’ewe’e dödögu Lowalangi ba urakhagu, irugi zi lö aetu” (Sin. 73:26). Ba daroma li andrö, lö si tobali fa’abu dödöda na no tana khöda Lowalangi. Heŵa’ae ba wa’afökhö, ba wa’anumana, ba ba mbaŵa deu so ita, ba lö sa’ae samabali ya’ita khö Lowalangi, si mane nifaduhu’ö Waulo ba zura Roma 8:38-39. Börö zi manö, fangosia’agö Lowalangi ba wa’auri andre zi tobali noro dödöda. Ya’ia gurakhada, ba lö sa’ae göi samabali ya’ita khö-Nia.
AMARAHUTA
Ba nidunödunö Habakuki andre, ta’ila sa’ae wa lö si tobali tahitahida fa böi omuso dödöda ba khö Zo’aya. Si ndruhu niŵa’ö Waulo, ena’ö “Böi ya mamalömalö wa’omuso dödömi, ba khö Zo’aya! Ufuli uŵa’ö: Mi’omusoi’ö dödömi!” (Fil. 4:4). Hadia no omuso dödöu ba khö Zo’aya iada’a?