Famobörö
So sambua zinunö imane: “Fondrorogö Ama ono wondrorogöMö ya’o, hulö ae ba gafi moyo woloheu ya’o. Na so mbaho ba ötaya ndra’odo fa böi te’ala na so hili wamakao ö’onoro öfasao. He So’aya samatörö si lö ambö fa’abölö, be’e khögu gehehau sango’ou ba samaha’ö (BZ AFY No. 22 ayati 4). Ba zinunö andre ifa’ema wa niha same’e saŵatönia Döi Yehowa ba irorogö Lowalangi si mane fondrorogö Ama nono, he na oya wamakao ha sambalö I’onoro ba Ifasao.
Taroma li Lowalangi khö Zefania, ono Gadalia, tefa’ema me luo razo mado Yuda, Yosia (1:1). Ba ginötö andrö, ba niha mado Yuda banua Yerusalema ba ibörögö sa’ae fandröndröu dödöra khö Yehowa Lowalangi, me no niha sabe’e tandro ba si lö molo’ö oroisa Lowalangi. Andrö wa ifatenge Lowalangi Zefania ba niha mado Yuda ba Yerusalema ba wangombakha khöra fawu’usa li Lowalangi (janji Allah) ba wamalalini ba ba wamohouni era’era ba wamondrongo oroisa Lowalangi.
Hadia ia zitobali horö Yerusalema? 1) Banua sabe’e tandro, si no ra’ira’iö, banua samakao awöra. Lö lafondrondrongo goroisa ba lö ba dödöra wotu, lö manötöna khö Yehowa, ba lö la’ondrasi Lowalangira, (3:1-2); 2) No timba zingo si ndröndröndröndrö zalaŵara, ba sanguhuku ba khöra, ba no timba nasu gatua, na bongi, lö lasaigö hadia ia irugi mahemolu mbanua (3:3); 3) Sama’ele’ö andrö khöra, ba no si lö ngaroro, no niha si falimolimo. Ba ere khöra, ba ra’iö ni’amoni’ö labe’e, mosala ba goroisa ira (3:4).
Famotokhi
Si föföna, Ba wombali’ö sawatöda döi Yehowa, ya’ia ba wangidengide’ö föna Lowalangi (kerendahan hati). Ba ayati 9 imane: U ‘asogö ba niha mbewe si sökhi, ena’ö dozi la’angaröfi li döi Yehowa, ena’ö te’anö manö ira we’amöi enoniNia. Eluahania ba da’a fawu’usa li Lowalangi ba niha si so famohouni ba wamalalini fa’auri ba niha mado Yuda ba Yerusalema, wa lö idölö dödöNia Lowalangi ba niha sangalui Ya’ia. I’asogö ba niha mbewe si sökhi. Bewe (bibir), ba li Ndrawa Heberai’o ya’ia safah eluahania ucapan ma perkataan yang keluar dari mulut, safah barurah eluahania bibir yang bersih. Ba moguna ia tobali howu-howu, fehede ba wangidengide’ö tanö föna Lowalangi. Ba tola göi tobali fehede fangelifi ba niha si lö mangila mangoguna’ö ya’ia. Bewe andrö ba no ndrotondroto ba mboto niha, no sökhi sibai ia na te’oguna’ö ia ba wo‘angaröfi li Lowalangi.
Si dua, Same’e saŵatönia döi Yehowa ba Itörö lala satulö (hidup dalam kebenaran dan pemulihan). Ba ayati 11, imane: ba na luo da’ö, ba lö’ö sa’ae aila ndra’ugö golalöwau andrö fefu, si no molalö ndra’ugö KhöGu. Na luo da’ö, ba Uheta ba khömi zi fayawa, sa’iki ba khömi, ba lö’ö sa’ae fayawa ndra’ugö ba hili andrö khöGu Ni’amoni’ö. Eluahania, na so wanörö lala satulö, ba na so wamohouni, si ndruhu Yehowa andrö me sawatöda Ia götögötö wa’ara.
Ayati 12 imane: ba Usaigö khömi, niha si numana, si lö fayawasa; da’ö dania zame’e sawatöra töi Yehowa. Eluahania wa lö fefu niha mado Yuda banua Yerusalema mamalalini era’era ba hiza so sa’atö zitosai si lö fayawasa same’e sawatöra döi Yehowa.
Si tölu, Same’e sawatönia döi Yehowa, ba falukha wa’omuso dödö (sukacita). Ba ayati 13-15 imane: Ba sitosai iraono Gizera’eli andrö, ba lö’ö sa’ae molalö; lö’ö sa’ae molau faya ira, ba lö’ö sa’ae falukha lela si falimo, ba mbawara; mangalui göra ira ba mörö dania ira ba lö si samakiko ya’ira. A’iki, ya’ugö ono Ziona alawe, mi’owuawua’ö dödömi, ya’ami Iraono Gizera’eli! Omusoi’ö dödöu, ba a’iki moroi si’aikö ba dödöu, ya’ugö ono Yerusalema alawe. Eluahania, wa banua Yeruzalema si no mangerogö Lowalangi no ifuli ihakhösi tödö ira Lowalangi ena’ö labe’e sawatöra döi Yehowa, si fao fa’owuawua dödö.
Famatöfa
Na ta’angerönusi daroma li Lowalangi andre, asese ba wa’auri Niha Keriso labe’e saŵatöra nawöra niha, na so noro dödöra, na so wa’abasaki ba lala wa’aurira. Hiza, ifarou ita ena’ö ha Lowalangi zaŵatöda, me lö tebulö Ia khöda götö-götö wa’ara. Töi Yehowa, tenga asala mutötöi ia, ya so khöda wa’aboto ba dödö, hewisa wa’abölöNia wa si lö faröi Ia.